Nə üçün bu dörd qeyd
Domen poçtu ilə bağlı problemlərin böyük hissəsi eyni dörd DNS qeydinin birindən çıxır. Onların işi bölünüb və bu bölgünü bilmək diaqnostikanın yarısıdır:
- MX — sizə GƏLƏN məktub. Yoxdursa, sizə yazan adamın məktubu ümumiyyətlə çatmır.
- SPF — sizin GÖNDƏRDİYİNİZ məktub, göndərən server tərəfindən. Hansı serverlərin sizin adınıza göndərə biləcəyini sadalayır.
- DKIM — yenə gedən məktub, amma bu dəfə məktubun özünə atılan rəqəmsal imza. SPF-dən fərqli olaraq yönləndirmədən sağ çıxır.
- DMARC — SPF və DKIM nəticəsini istifadəçinin gördüyü
Fromünvanı ilə bağlayır və uzlaşmayan məktubla nə ediləcəyini deyir.
Bu bölgü bir çox yanlış anlaşılmanı aradan qaldırır. Ən çox rast gəlinəni: «MX yaşıldır, amma məktublarım spama düşür». MX gələn poçta aiddir və gedən məktubun taleyinə heç bir təsiri yoxdur — həmin problem SPF, DKIM və ya DMARC tərəfindədir.
Bu alətlər nə edir və nə etmir
Hər alət ictimai DNS-ə (1.1.1.1 və 8.8.8.8) sorğu göndərir və cavabı oxuyur. Serverinizə qoşulmur, məktub göndərmir, məktublarınızı oxumur və heç bir şifrə tələb etmir. Yoxlanılan domen saxlanılmır.
Eyni dərəcədə vacib olan budur ki, bu alətlər çatdırılmanın hamısını ölçmür. DNS qeydləri şəkilin bir hissəsidir; qəbul edən tərəf bundan başqa göndərən IP-nin reputasiyasına, şikayət nisbətinə və məktubun məzmununa da baxır. Bunları ölçmürük və ölçdüyümüzü də iddia etmirik. Dörd qeydi də yaşıl olan domenin məktubları hələ də spama düşə bilər — o halda səbəb başqa yerdədir.
Yoxlama üsulu barədə bir texniki qeyd
Sorğular sistem ad serverinə deyil, birbaşa ictimai həll edicilərə göndərilir. Səbəb praktikidir: serverin öz keşi köhnə cavab saxlaya bilər və biz sizə «qeyd yoxdur» deyərik, halbuki siz onu bir neçə dəqiqə əvvəl əlavə etmisiniz.
Nəticədə iki fərqli mənfi hal ayrılır və bu ayrım qəsdəndir: «tapılmadı» qeydin DNS-də olmadığını bildirir, «yoxlaya bilmədik» isə sorğunun özünün alınmadığını. İkisini eyni cür göstərsək, şəbəkə problemi olan gün hamıya «qeydiniz yoxdur» deyərdik və insanlar düzgün işləyən DNS-i sökməyə başlayardı.
Tez-tez verilən suallar
Alətlər həqiqətən pulsuzdur?
Bəli. Qeydiyyat, kart məlumatı və e-poçt ünvanı tələb olunmur. Yoxlama nəticəsi saxlanılmır və reklam üçün işlədilmir. Yeganə hədd sürət həddidir — servis hamı üçün açıq qalsın deyə qısa müddətdə çox sayda sorğu göndərmək mümkün deyil.
Yalnız Mailora müştəriləri üçündürmü?
Xeyr. Alətlər istənilən domeni yoxlayır — Google Workspace, Microsoft 365, Zoho, Yandex, cPanel və ya öz serveriniz. Yoxlama ictimai DNS məlumatına baxır, yəni domenin kimdə saxlandığının fərqi yoxdur.
Nəticə paneldəki yoxlama ilə eynidirmi?
Bəli, məntiq eynidir — bir dəfə yazılıb iki yerdə işlədilir. Fərq yalnız kontekstdədir: paneldə biz sizin domeninizin gözlənilən dəyərlərini bildiyimiz üçün müqayisə daha dəqiq olur (məsələn DKIM selektorunu soruşmağa ehtiyac qalmır).
Nəticə yanlış görünürsə nə etməli?
Əvvəlcə terminaldan yoxlayın — hər alət səhifəsində dig və nslookup əmrləri verilib. Fərq varsa bizə salam@mailora.az ünvanına yazın və domeni göstərin. Yoxlama məntiqindəki səhv bizim üçün ciddi məsələdir: eyni kod müştərilərin domenlərini də yoxlayır.
Yoxlamaqdan yorulmusunuzsa
Mailora domeni əlavə edən kimi bütün qeydləri hazır verir və eyni yoxlamanı arxa planda daim aparır — qeyd sonradan pozulsa, bunu məktublarınızın itməsindən yox, paneldən öyrənirsiniz. Domen başına 5 AZN / ay, poçt qutusu sayı limitsizdir, ƏDV tutulmur.