Dörd qeyd hansı sualı cavablandırır
| Qeyd | Nəyə aiddir | Olmayanda nə olur |
|---|---|---|
| MX | Gələn poçt | Sizə yazan adamın məktubu ümumiyyətlə çatmır. |
| SPF | Gedən poçt — göndərən server | Məktublarınız şübhəli sayılır və çox vaxt spama düşür. |
| DKIM | Gedən poçt — məktubun imzası | Yönləndirilmiş məktublar doğrulanmır; Gmail tələbi qarşılanmır. |
| DMARC | Sizin adınıza spufinq | Başqası sizin domeninizdən məktub göndərə bilər və siz bunu bilmirsiniz. |
Sıra təsadüfi deyil. MX olmadan poçt qutusu boş qalır — bu, ən görünən problemdir və adətən birinci düzəldilir. SPF və DKIM göndərilən məktubun taleyinə aiddir və problemləri səssizdir: heç bir xəta gəlmir, sadəcə qarşı tərəf məktubu görmür. DMARC isə sonuncudur, çünki o, SPF və DKIM nəticəsinin üstündə işləyir və onlarsız heç nə edə bilmir.
Ardıcıllıq: nədən başlamalı
- MX-i düzəldin. Köhnə MX qeydləri silinməlidir — prioriteti kiçik olan qazanır və poçt köhnə sistemə getməyə davam edir.
- SPF-i bir sətrə yığın. Domendə yalnız BİR SPF ola bilər; ikisi olanda hər ikisi etibarsızlaşır.
- DKIM açarını yerləşdirin və qeydin kəsilmədiyinə əmin olun.
- DMARC-ı p=none ilə açın, hesabatlara baxın, sonra mərhələ-mərhələ sərtləşdirin.
Google-un göndərən tələbləri
Gmail 2024-cü il fevralın 1-dən göndərənlərə bir sıra tələblər qoyub və onlar artıq məsləhət deyil, məcburi şərtdir. Tələblərin siyahısı support.google.com/mail/answer/81126 ünvanında dərc olunub. Qısaca:
| Tələb | Mailora-da vəziyyət |
|---|---|
| SPF və ya DKIM | Hər ikisi qurulur |
| Göndərən serverin düz və tərs DNS uyğunluğu | Qurulub |
| TLS ilə qoşulma | Gmail-ə TLSv1.3 ilə |
| RFC 5322 formatı | Qarşılanır |
| DKIM açarı ən azı 1024 bit | 2048 bit |
| Spam şikayəti 0,3 faizdən aşağı | Ölçülmür — aşağıdakı qeydə baxın |
Sonuncu sətri dürüst yazmaq lazımdır. Şikayət nisbətini yalnız Google-un öz Postmaster Tools xidməti göstərir və bizim orada hələ qeydiyyatımız yoxdur — yəni bu göstərici bizdə ölçülmür. «Bütün tələbləri qarşılayırıq» yazmaq asan olardı, amma ölçmədiyimiz bir şey barədə iddia etmək olmaz. Qalan beş bənd 2026-08-18/19-da bu serverdən yoxlanılıb.
Nəticələr nə deməkdir
- Qaydasındadır — qeyd DNS-də var və məzmunu gözlənilənə uyğundur.
- Problem var — qeyd yoxdur və ya məzmunu düzgün deyil. Sətrin altındakı izah nə etmək lazım olduğunu deyir.
- Yoxlaya bilmədik — sorğunun özü alınmadı. Bu, «qeydiniz yoxdur» demək DEYİL: ad serveri cavab verməmiş, vaxt bitmiş və ya xəta qaytarmış ola bilər. Belə halda bir az sonra təkrar yoxlayın.
- Sarı xəbərdarlıq — qeyd işləyir, amma diqqət tələb edir. Məsələn SPF-in sonunda «all» mexanizminin olmaması: sizin məktublarınız keçir, lakin qeyd başqalarının sizin adınıza göndərməsinə mane olmur.
Bu alət nəyi ölçmür
Dürüst siyahı: burada yalnız DNS yoxlanılır. Ölçülməyənlər — göndərən IP-nin reputasiyası, qara siyahılarda olub-olmaması, istifadəçilərin şikayət nisbəti, məktubun məzmunu və göndərmə sürəti. Dördü də yaşıl olan domenin məktubları hələ də spama düşə bilər; belə halda səbəb DNS-də deyil, yuxarıdakı siyahıdadır.
Terminal ilə əl ilə yoxlama
dig +short MX sirket.az
dig +short TXT sirket.az
dig +short TXT mailora1._domainkey.sirket.az
dig +short TXT _dmarc.sirket.az
İkinci əmrin cavabında v=spf1 ilə başlayan sətri axtarın —
TXT yazıları arasında başqa qeydlər də olacaq (sahiblik təsdiqləri,
xidmət nişanları). Üçüncü əmrdə mailora1 yerinə öz
selektorunuzu yazın.
Tez-tez verilən suallar
Dördü də yaşıldır — məktublarım artıq spama düşməyəcək?
Belə demək düzgün olmazdı. DNS qeydləri çatdırılmanın YALNIZ bir hissəsidir. Qəbul edən tərəf bundan başqa göndərən IP-nin reputasiyasına, istifadəçilərin şikayət nisbətinə, məktubun məzmununa və göndərmə sürətinə də baxır. Bu alət yalnız DNS-i görür; qalanını ölçmür və ölçdüyünü iddia etmir.
Hansı qeyddən başlamalıyam?
Ardıcıllıq belədir: əvvəlcə MX — o olmasa poçt ümumiyyətlə gəlmir. Sonra SPF və DKIM — onlar göndərdiyiniz məktubun qəbul edilməsinə aiddir. DMARC isə sonuncudur, çünki o, SPF və DKIM-in üstündə işləyir ve onlarsız mənası yoxdur.
DKIM sətri boş qaldı, niyə?
DKIM açarı selektor adı olmadan tapıla bilmir və DNS-də selektorların siyahısı saxlanılmır. Selektoru boş buraxsanız, DKIM yoxlanılmır. Selektorun adını göndərilmiş məktubun DKIM-Signature başlığındakı «s=» hissəsindən götürün.
Nəticədə «yoxlaya bilmədik» yazılıb — bu, qeydin olmadığı deməkdirmi?
Xeyr, və bu fərq qəsdən saxlanılıb. «Tapılmadı» qeydin DNS-də olmadığını bildirir; «yoxlaya bilmədik» isə sorğunun özünün alınmadığını — ad serveri cavab vermədi, vaxt bitdi və ya xəta qaytardı. İkisini eyni rəngdə göstərsək, şəbəkə problemi olan gün hamıya «qeydiniz yoxdur» deyərdik və insanlar düzgün qurulmuş DNS-i sökməyə başlayardı.
Google-un göndərənlərə qoyduğu tələblər hansılardır?
Google 2024-cü il fevralın 1-dən Gmail-ə göndərənlərdən bunları tələb edir: SPF və ya DKIM, göndərən serverin düzgün düz və tərs DNS qeydi, TLS ilə qoşulma, RFC 5322-yə uyğun məktub formatı, ən azı 1024 bitlik DKIM açarı və spam şikayətlərinin 0,3 faizdən aşağı saxlanması. Şərtlərin mətni support.google.com/mail/answer/81126 ünvanındadır.
Bu dörd qeydi bir dəfə qurub unutmaq
Mailora domeni əlavə edən kimi bütün qeydləri hazır şəkildə verir və onları daim izləyir — burada gördüyünüz yoxlama paneldə arxa planda işləyir, yəni qeyd sonradan pozulsa bunu məktublarınızın itməsindən yox, bildirişdən öyrənirsiniz. Qiymət domen başına 5 AZN / ay, poçt qutusu sayı limitsizdir və ƏDV tutulmur.